Правната рамка на Европската Унија во врска со правото на животната средина

Правото на животната средина, како едно од есенцијалните фундаментални
човекови права, често претставува предмет на расправа, и од аспект на неговата
содржина и од аспект на неговата природа, особено во последните неколку децении.
Свеста за заштита на правото на животната средина во поново време се носи на едно
ново ниво, со цел остварување на истото. Во светот на науката, постојат експерти кои
ваквото право го декларираат и како трета генерација на човекови права.
За климатските промени, како и заштитата на животната средина, ЕУ формулира и
спроведува климатски политики и стратегии, преземајќи водечка улога во меѓународните
преговори за климата. Европската Унија исто така игра една од клучните улоги во
промовирањето на одржливиот развој на глобално ниво. Всушност, одржливиот развој
е главна цел за ЕУ, која е посветена на „високо ниво на заштита и подобрување на
квалитетот на животната средина“, согласно член 3 од Договорот за Европската унија,
за кое ќе се елаборира подетално во овој труд.