Информираност на пациентите со дијабетес тип 2 за превенција на хроничните компликации од дијабетот

Вовед: Лицата со дијабетес имаат зголемен морбидитет и морталитет поради акутните и хронични
компликации кои ги предизвикува дијабетот. За превенција на истите потребна е едукација на пациентите и редовни скрининг прегледи. Материјали и методи: На 57 последователни пациенти со дијабетес, кои ги посетија Центарот за дијабет во Клиничката болница во Штип им се подели анонимен прашалник. Прашалникот се состоеше од 15 прашања поврзани со информираноста на пациентите за хроничните компликации кои ги предизвикува дијабетот и честотата на скрининг прегледи кои секој пациент ги изведува. Резултати: Пациентите беа на просечна возраст од 63 години, од кои 38 беа жени и 19 мажи, со просечно времетраење на дијабетот од околу 9 години. Дваесет и шест или 46% од испитаниците биле запознаени со компликациите од дијабетот, а 31 испитаник или 54% не биле запознаени. Дваесет и шест проценти од испитаниците не проверувале редовно HbA1c, липиди и микропротеинурија во урина, 30% не го мереле редовно крвниот притисок, 56% не правеле преглед на очно дно еднаш годишно и 69% не ги самопрегледувале своите стапалата. Заклучок: Неопходни се редовни едукации кај лицата со дијабетес за комплика-
циите од истиот, бидејќо голем е процентот на лица кои не се запознаени со компликациите и не изведуваат скрининг прегледи за истите.