Туристичките потреби и бенефити од спа услугите на бањите во Република Северна Македонија

Во извештајот на Светската туристичка организација од декември 2018, здравствениот туризам се дефинира како „туризам кој ги опфаќа типовите на туризам кај кои примарна мотивација е придонесот за физичкото, менталното и/или духовното здрваје преку медицински или велнес активности“. Светската туристичка организација јасно ја нагласува важноста на овој вид туризам и потребата за негово истражување. Во најновиот извештај на Светската туристичка организација се вели следното: „Здравствениот, велнес и медицинскиот туризам бележат експоненцијален раст во последниве години и стануваат се повеќе релевантни во многу дестинации“. Здравствениот туризам е итен, глобален, комплексен и рапидно променлив сегмент што има потреба да биде подобро разбран од дестинациите кои се волни да се ослонат на можностите и подобро да ги согледаат предизвиците.