Индивидуализирана фитотерапија и модерни аспекти на улогата на фармацевтот во издавање на хербални лекови во аптека

Индивидуализираната терапија станува основа на модерниот пристап во лекувањето, со цел обезбедување грижа која ги зема предвид специфичните потреби на секој пациент. Овој вид на персонализираната медицина претставува една од најактуелните теми во поново време која се стреми со посебен пристап преку имплементација на omics – алатките (геномикс, метаболомикс, протеомикс и сл.) да даде насоки за конкретна фармакотерапија на даден пациент.

Оваа тенденција постепено завзема се позначајно место во рационалната фитотерапија, која сè повеќе се вклучува како значаен дел од терапевтските протоколи. Хербалните лекови кои опфаќаат повеќе категории на производи (готов хербален лек и традиционален хербален лек), како и другите производи од хербално потекло (суплементи и гранични производи) стануваат сѐ попознат избор за пациентите кои бараат природни и често помалку инвазивни алтернативи за третман на хронични состојби, анксиозност, несоница и имунодефицитни состојби. Овој тренд ја нагласува потребата за добро информирани и обучени фармацевти, кои играат клучна улога во советување, издавање и индивидуализација на хербалните препарати.