Калкулации: Избрани теми

Ракописот е наменет првенствено за студентите кои го изучуваат предметот Калкулации на Факултетот за туризам и бизнис логистика при Универзитетот „Гоце Делчев“ - Штип. Основна цел е да им помогне на студентите во совладување на најважните поими и концепти. Нивото и стилот на обработка на материјата се приспособени кон знаењата и потребите на студентите од додипломските студии.
Начинот на појаснување на сите обработени прашања е многу пристапен. Оттука и можноста за користење на овој материјал не само од студентите на Факултетот за туризам и бизнис логистика, туку и пошироко. Имајќи предвид дека ова е прво издание, не е исклучена можноста да има одредени недостатоци, па секоја сугестија и забелешка ќе бидат прифатени со посебно задоволство.
Учебникот е напишан со јасен и разбирлив јазик, методолошки структуриран во дванаесет глави кои меѓу себе се поврзани. Секој дел започнува со кратко информативно појаснување за точките кои ја обработуваат главната тема. Воедно, поставени се целите на учење кои студентите треба да ги постигнат. Во секоја тема вклучени се примери на решени задачи со цел да се доближи материјата до студентите. По секоја тема понудени се прашања за дискусија што им овозможува на студентите да проверат дали целосно ја разбрале наставната материја. Истовремено, дадени се задачи за вежбање со понудено решение за самоконтрола како дополнителна подготовка за полагање колоквиум и испит. На крајот на ракописот се соодветно нотирани библиографските единици.