Одржлива мода

Прирачникот по Одржлива мода, со своите содржини е компатибилен со истоимената
наставна програма за содржини програмирани од училиштето за III (трета) година,
за сите образовни профили/квалификации од струка/сектор, текстилно-кожарска/
текстил, кожа и слични производи.
Со своите содржини, Прирачникот ќе им овозможи како на наставниците така и на
учениците, да ги прошират своите видици за сè она што во светски рамки е предмет
на дискусија, изнаоѓање решенија и поттикнување на свесноста за општествена
одговорност на секоја влада, поединец и компаниите за заштитата на нашиот
заеднички дом, планетата Земја, и климата.
Како автори, сметавме дека оваа тема е глобална и заслужува да е во фокусот и на
нашиот образовен систем, со што нашите ученици би се приклучиле на светските
трендови каде што младите се носители на промените особено во заштитата на
природата и на климата.
Прирачникот опфаќа три поглавја: поглавје 1, Вовед во одржлива мода; поглавје 2,
Отпад од модна индустрија; и поглавје 3, Мода и климатски промени. Поглавјата имаат
свои поттеми што постапно нè воведуваат за полесно да се разбере потребата
за одржлива мода и придобивките од неа. Секое поглавје почнува со клучни поими и
предговори, од кои учениците накусо ќе се запознаат што можат да очекуваат да
научат од тоа поглавје. Освен теоретски дел, има и предложени примери за вежби и
проектни активности и насоки за нивно спроведување.
Прирачникот, исто така, има за цел да го поттикне креативниот и интерактивниот
однос на наставникот и на учениците. Искуствено, како долгогодишни практичари,
сметаме дека Прирачникот е алатка со која најголем дел од знаењата можат да се
усвојат на самиот час, ако се применат современи техники и методи за активно
учење на часот.
На тој начин, учениците ќе бидат активни чинители во креирање на часот, со што ќе
стекнат и ќе развиваат знаења, вештини и компетенции за одржлив животен стил,
поголема свесност и општествена одговорност кон животната средина, поголема
самодоверба, вештини за критичко размислување, тимска работа, комуникациски и
социјални вештини.