Правото на конкуренција vis-à-vis правото на слободно движење на услугите во Европската унија: студија на случај

На 18 април 2021 година, во согласност со шпанското законодавство, е формирана Компанија за европска суперлига
(КЕСЛ), на почетокот составена од дванаесет фудбалски клубови. Компанијата, преку 12 големи европски фудбалски клубови, го објави создавањето на Европската суперлига (ЕСЛ), како европско фудбалско натпреварување, кое треба да постои независно од системот, регулиран од Меѓународната фудбалска федерација (ФИФА) и Унијата на европски фудбалски асоцијации (УЕФА), како управни тела на светскиот и европскиот фудбал. Во својот оригинален формат, ЕСЛ е предвидена да биде полузатворена со 20 клубови, од кои 15 ќе бидат постојани клубови, а преостанатите тимови ќе се квалификуваат на годишно ниво. Притоа, формиран е спортски менаџмент А22 за да ги спонзорира и да им помогне на основачките членови во создавањето на ЕСЛ. Клубовите би играле меѓу себе, прво во групна фаза, а потоа и во формат на елиминации, но без можност од испаѓање на крајот од секоја сезона. Создавањето на КЕСЛ и формирањето на ЕСЛ крена голема прашина во фудбалскиот свет бидејќи УЕФА и неколку национални фудбалски асоцијации издадоа соопштенија со кои одбија да ја признаат ЕСЛ и притоа упатија предупредувања за дисциплински мерки против клубовите и играчите што ќе бидат дел од ЕСЛ, меѓу кои забрана за натпреварувања, организирани од ФИФА и УЕФА, како и претставување на националните тимови. Само 48 часа по официјалното објавување, повеќето клубови, особено оние од Англија, ја укинаа поддршката за ЕСЛ и се повлекоа од проектот. Исто така, и навивачите, играчите и политичарите го изразија своето противење на предлогот со заклучок дека создавањето на ЕСЛ е штетно за фудбалот.