Примена на посебни истражни мерки - Случаи од правосудната практика на Република Северна Македонија

Развивањето на оваа збирка на судски случаи од македонската правосудна практика со применети посебни истражни мерки започна во мај 2023 година. Збирката ја документира примената на принципите за одобрување и спроведување на овие мерки. Документот првенствено е наменет за припадниците на правосудната полиција, јавните обвинителства и судовите. Публикацијата ќе има соодветен придонес кон стандардизација на дејствијата на релевантните субјекти во предистражната, истражната и кривичната постапка и во унапредување на квалитетот на дејствијата поврзани со примената на ПИМ, особено квалитетот на предлозите, барањата и наредбите за нивно определување. За потребите на овој проект, по барање на Академијата за судии и јавни обвинители, македонските правосудни органи делегираа три стручни лица со познавање на кривичната, а особено кривично-процесната материја и тоа од Основно јавно обвинителство Скопје, Основното јавно обвинителство за гонење на организиран криминал и корупција и Основниот кривичен суд во Скопје. Уредник на публикацијата е проф. д-р Билјана Каровска-Андоновска која воедно ја разви методологијата за систематизирање на случаите и за концептуализација на оваа збирка.