Технолошки развој на малите и средни претпријатија во РМ преку програми за соработка со странски партнери

Во услови кога се располага со релативно доволен обем и соодветна структура на развојни фактори, технолошкиот развој може да се остварува без поголеми потреси и тешкотии. Меѓутоа во услови на недоволна стопанска развиеност и оскудност со развојни фактори, особено оскудност со инвестиции, каков што е случајот со Република Македонија, технолошкиот развој е мошне ограничен. Економското преструктуирање на стопанството создаде многу мали и нови претпријатија на кои им е нужна помош и разни видови поддршка во нивното работење од релевантни институции, а пред се во создавање на поволен деловен амбиент за стопанисување без пречки. Република Македонија мора да продолжи со активностите за поддршка на малите и средни претпријатија и во наредниот период. Основната цел на таа поддршка мора да биде подготовка на малите и средни претпријатија да бидат поконкурентни и поспремни за влегување во Европската Унија.