Третманот на книжевноста за деца и вредносните критериуми на книжевните текстови во списанијата за деца

Творештвото за деца претставува носечки столб на секоја национална литература. Македонската литература си обезбедила свој континуитет во времето, бидејќи на своите страници отстапила место на авторите кои создаваат литература за деца. Литературата за деца е највредниот учебник од кој детето учи за светот, го запознава со сите убавини и недостатоци, го проширува хоризонтот на гледање на нештата, го поттикнува и развива когнитивниот потенцијал кој секое дете го поседува. Читањето квалитетна литература и општењето со квалитетни списанија, значи градење високи критериуми за тоа, како треба да ѝ се пристапи на литературата за деца. Да се создава литература наменета за децата, подразбира подготвеност на авторот да се соочи со еден специфичен реципиент кој бара естетско-етичката, моралната, образовната и најмногу од сѐ воспитната компонента, да бидат соодветно дозирани и прилагодени на неговиот светоглед.