Електро-енергетски состојби и перспективи во Република Македонија

Три основни заклучови мора да се имаат предвид пред да се започне било која анализа околу енергетските перспективи на Република Македонија (РМ) на почетоков на овој милениум, и тоа: (1) РМ е енергетски сиромашна земја, (2) РМ има силно енергетски интензивна индустрија додека енергетската ефикасност во земјата е неприфатливо ниска, и (3) РМ нема среднорочна ниту долгорочна конзистентна енергетска политика и стратегија.
Во овој труд, ќе се обидам накратко да ги дефинирам причините кои доведоа до ваквите енергетски состојби и да ги опишам моменталните енергетски состојби во РМ, особено во електроенергетскиот сектор (ЕЕС). Исто така ќе се осврнам на неколку идеи на кој начин да се подобрат сегашните состојби како и да се зајакнат истите и да се припремат за предизвиците кои ги носи глобализацијата и формирањето на регионалните и глобалните енергетски пазари во регионов, проследени со определни заклучоци.