На брегот, живот! (Георги Барбаровски: „Покрај матицата“, Панили, Скопје 2020)

Современите уметнички дела (книжевни, музички, сликарски, филмски,скулпторски) воопшто, имаат своја специфична палимпсестна карактеристика.
Создавани врз веќе познати создателства на големите умови пред нас, делата пренесуваат пораки некогаш одамна кажани и пуштени слободно да се движат низ времето и просторот. И нема да биде многу ако констатираме дека живееме во свет на пресоздавање, преобликување, доусовршување, па и откривање
на новите значења на уметничките дела кои ја интерпретираат актуелната стварност. Постапката е иста, но различни се медиумите низ коишто се пренесува пораката.