Карактеризација на препарати со хијалуронска киселина и нивна примена за козметички и медицински цели

Формулацијата на иновативни препарати со хијалуронска киселина е сѐ поактуелна во козметичката индустрија и медицината. Хијалуронската киселина игра круцијална улога против процесот на стареење на кожата кој се должи на внатрешни и надворешни фактори. Без оглед на фактот што овие процеси се разликуваат, појавата на реактивни слободни радикали кои потекнуваат од клеточниот метаболизам, е во основата на стареењето на кожата. Реактивните слободни радикали при внатрешното и надворешното стареење на кожата го индуцираат транскрипциотиот фактор с-Jun, преку митоген активирана протеин киназа, што предизвикува експресија на матрикс металопротеинази и намалување на експресијата на проколаген-1. Зголеменото ниво на деградиран колаген и редуцирана продукција води до појава на стареење на кожата. Покрај овој фактор, намалувањето на влажноста на кожата е клучен сегмент во појавата на брчки. Главна улога за обезбедување на хидратација на кожата игра хијалуронската киселина, со нејзината способност за врзување и задржување на вода како високохигроскопна молекула.