Застапување во граѓанското и трговското право

Правото во субјективна смисла, сфатено како свесно остварување на правата и
обврските на неговите субјекти, мора да го има предвид и прашањето на субјектите што
не располагаат со свест за своите правни овластувања и задолженија. Исто така, од
особена важност е и прашањето на свеста и волјата на субјектите кога станува збор за
нивно колективно изразување, кај здружувањето на физичките лица во правно лице,
односно дали здружените физички лица и натаму ја задржуваат својата индивидуална
волја и свест. Така, може да се констатира дека за успешно постоење и функционирање
на правните односи и правниот промет потребно е конституирање на посебни правни
институти меѓу кои посебно место зазема институтот застапник, односно правен агент,
како лице кое може да дејствува, да изјавува волја и да презема други правни работи и
во свое име и во своја корист, но и во туѓо име и во туѓа корист.