Развој на дијагностички радиофармацевтици базирани на радиообележани пептиди: Супстанца „P“

Супстанца „Р“ е невропептид од тахикининската група, кој се состои од единаесет аминокиселини. Овој пептид, покажува најголем афинитет кон неврокинискиот рецептор (NK1), кој се наоѓа во повеќе нормални ткива: мозок, лимфатично ткиво, тимус и плунковни жлезди. Висок афинитет за врзување на супстанца „Р“ е забележан кај неколку неоплазми кои покажуваат зголемена експресија на овој рецептор. Во исто време, покажано е дека овој пептид игра улога во патогенезата на воспалителните процеси. Цел на истражувањето: Целта на ова истражување е да се подготви и карактеризира аналог на супстанција Р комплексиран со 99mTc, кој би можел да се користи како дијагностички агенс. Материјали и методи: Подготовката на комплексот се одвива во две фази, при што првата се формира нитридо-јадро [99mTc≡N]2+, кое во втората реакција се врзува со тридентатниот дериват на супстанција Р (SNS-SP): [SP = Cys-Cys-Arg-Pro-Lts-Pro-Gln-Gln-Phe-Phe-Gly-Leu-Met] и мондентатниот лиганд - PCN, (Х): монофосфин-трис-(2-цијаноетил)-фосфин, при што се формира т.н „3+1“ комплекс [99mTc(N)(SNS-SP)(X)]. Добиениот комплекс се прочистува со реверзно-фазна хроматографија. Радиохемискиот принос е определен со HPLC хроматографија. SPECT студиите и снимките со X-зраци, се направени со интегриран дигитален систем за снимање со Х-зраци и YAP-(S)PET скенер. Резултати: Добиениот радиохемиски принос на [99mTc(N)(SNS-SP)(X)] комплексот се движи во граници од 94.5 ± 3.0. При проценка на стабилноста на комплексот во серум и стабилност при трансхелација со глутатион и цистеин, не се покажа значајна промена во радиохемиската чистота после 24 часа инкубација на 37°C. Добиените снимки покажуваат висока концентрација на комплексот во бубрезите и во мочниот меур, а помали концентрации се забележани во црниот дроб и дигестивниот апарат. Може да се забележи постоење на извесна активност во тимусот и плунковните жлезди. Заклучок: Подготвен е нов комплекс, со состав [99mTc(N)(SNS-SP)(PCN)] со висок принос, кој може да се формулира како радиофармацевтик за дијагностика на ткива кои експресираат рецептори за Супстанца„Р“ (воспалителни процеси, неоплазми со зголемена експресија на рецептори за Супстанца „Р“).